sunnudagur, október 30, 2005

Sofnaði í vinnunni

Viggó "Viðutan" Benjamínsson, þýðandi, sofnaði við vinnu sína í gærdag. Yfirmaður Viggós, Veturliði Guðnason, kom að honum sofandi við tölvuna sína, þar sem hann lá með andlitið á lyklaborðinu. Sagði Veturliði þetta ekki fyrsta skiptið sem slíkt gerðist, en Viggó ku vera afar sofinn starfskraftur.


"Ég var að þýða kvikmyndina Apocalypse Now Redux, eða Dómsdagur nú rauður uxi, þegar ég fann bara hversu úrvinda ég var. Ég gerði það bara eina mögulega í stöðunni, að sofna aðeins, því yfirleitt hefur þreytan áhrif á verk okkar hérna í þýðingardeildinni sko," sagði Viggó frekar viðutan við blm VSP í dag.


Viggó hefur þýtt fjölda kvikmynda. Þeirra á meðal eru Steini 1,2,3 og 4 (Rocky myndirnar), Kylfusveinninn (Batman), Á tæpasta vaði, (Leathal Weapon), Á hverfanda hveli (Gone with the wind), Hvíta húsið (Casablanca), Kviðristu Kobbi (Jack the Ripper), og Apakötturinn (King Kong).

fimmtudagur, október 27, 2005

George Best illa haldinn á sjúkrahúsi




















Best við vinnu sína


George Best, einn dáðasti knattspyrnumaður Bretlandseyja fyrr og síðar, lagðist inn á Jack Daniels sjúkrahúsið í Lager-sýslu í gær. Best hefur barist við Bakkus í áraraðir, og segist gjalda glys-áranna nú.

"Ég hélt að Best vissi allt best. En þegar allt kemur til alls, þá vissi Best ekki neitt", sagði Best við blm VSP í dag.

Best hefur að undanförnu fengist við betl og útigangsmannastörf, og segist hlakka til að byrja aftur í harkinu.

"Þetta er ágætt sko. Ég fæ yfirleitt meiri ölmusu en hinir strákarnir, því ég var nú einu sinni frægur nefnilega, ekki þeir", sagði Best óvenju hress.






Þess má geta að íslendingar eiga glæstan fulltrúa í atvinnudrykkju og útigangsmannastéttinni í útlöndum, en það er hinn óborganlegi Hermann Gunnarsson, sem stendur stoltur vaktina.

mánudagur, október 24, 2005

Ekkert að frétta

Í dag, 24. október, var ekkert merkilegt í fréttum.

sunnudagur, október 23, 2005

Andrés Önd illa haldinn af fuglaflensu


Heimsfræga fiðurféð, Andrés Önd, hefur verið lagður inn á Memorial sjúkrahúsið í Orlando, eftir að hafa greinst með H5n1 afbrigðið af fuglaflensu. Að sögn Ripps, Rapps, og Rupps, hefur frændi þeirra verið afar slappur eftir að hafa farið á stefnumót með Andrésínu sl. föstudagskvöld.

Dr. Georg Gírlaus sagði H5n1 veiruna auðveldlega smitast með kynmökum, og hugsanlega gæti hún smitast milli anda, ef um munnmök væri að ræða.

"Munnmök hafa löngum gengist við í Andabæ, jafnvel meðal andarunganna," sagði Jóakim Aðalönd, en hann er helsti talsmaður þess, að endur klæðist buxum. "Ástæðan er auðvitað sú, að allar endurnar, og jafnvel önnur dýr, hylja ekki á sér kynfærin, sem leiðir til þessarar dýrslegu hegðunnar," sagði Jóakim skækri röddu.

Samkvæmt talsmanni Disneyland skemmtigarðarins, mun Dr. Georg Gírlaus vinna með Hexíu de Trix að formúlu til lausnar á vandamálinu, svo framarlega sem Bjarnabófarnir verði ekki ljár í þúfu þeirra, og steli senunni.

föstudagur, október 21, 2005

Dræm aðsókn á Landsfund Vinstri hreyfingarinnar -græns framboðs














Frá landsfundi VG í kvöld

Engir gestir voru viðstaddir á landsfundi VG í kvöld, ekki einu sinni formaðurinn, Steingrímur J. Sigfússon. Steingrímur vildi ekki gefa kost á viðtali, en sagði ástæðuna fyrir slíkum forföllum einfalda: "...það eru bara allir að horfa á Idolið á þessum tíma. Ögmundur einfaldlega klikkaði, því enginn heilvita maður bókar sal á þessum tíma, þegar öll þjóðin sameinast fyrir framan sjónvarpið! "

Ögmundur Jónason kvaðst leiður yfir þessu óhappi, en sagðist ekki lítast á blikuna, þegar heil þjóð léti heilaþvo sig af "græðgisdrífandi kapítalistasvínum", og bætti því við, að VG væri samt þriðji stærsti flokkur landsins, þratt fyrir allt saman.

mánudagur, október 17, 2005

Kristján bætir við kúnnum

Athafnarmaðurinn og lífskúnstnerinn Kristján Jónsson hefur í samstarfi við Einar Bárðarson hinn alþjóðlega umboðsmann Íslands, sett saman hresst og skemmtilegt strákaband, sem kalla sig The Gert Jonnys. Bandið er samansett af Skandínavískum karlmönnum á aldrinum 30-40 ára, sem munu aðallega reyna að höfða til kvenna á aldrinum 65-80 ára. Mikið er gert úr sviðsframkomu og stílhreinum búningum, og allir meðlimir hafa reynslu af þjóðdönsum. Þeir Jens Svensson, Magnus Nilstrup, Skakki Pakkunen, og Tage Ammendrup eru bókaðir langt fram í tímann, og sagði Kristján Jónsson að Gylfi Ægisson myndi hita upp á næstu tónleikum, en þeir fara fram í bingósal elliheimilisins Hlífar á Ísafirði, miðvikudaginn 19. október, kl. 15:30.

þriðjudagur, október 11, 2005

Nú lest dagskrárliðurinn Gamlar stundir, gjörið svo vel

Nýr dagskrárliður!!!








Trausti við hönnun hins nýja dagskrárliðar

Þar sem helstu fjölmiðlar landsins hafa nýlega lappað uppá útlitið, RÚV, og Stöð 2, getur VSP ekki verið minni miðill.

Því mun verða boðið uppá dagskrárliðinn: Gamlar syndir, en það er afturhvarf til fortíðar, í máli og myndum.

Birtar verða myndir úr einkasafni Trausta Salvars, sem er æði skrautlegt og skemmtilegt, og eru meðlimir, sem og aðrir, hvattir til að senda áður óséðar myndir frá fyrri tíð, af meðlimum, velunnurum, og tengdum vinahópum.

Netfangið er: 6617777@talnet.is

mánudagur, október 10, 2005

Kristján Jónsson hvetur til spilavíta á vestfjörðum










Kristján í veðmáli á golfvellinum

Í nýútkominni greinargerð um niðurstöður íbúaþings á vestfjörðum kennir margra grasa. Þar koma fram ýmsar sniðugar hugmyndir um hvað mætti betur fara í bæjarfélaginu, auk hugmynda um nýsköpun í atvinnuvegum.

Einna frumlegust er þó sjálfsagt sú hugmynd sem kemur fram undir liðnum „Aðrar hugmyndir um eflingu atvinnulífs“ en á meðal hugmynda eins og „Meiri kvóta, og fallegra kvenfólk til Bolungarvíkur“, (Hugm.smiður:Guðni Hauks)„Útihátíðin Slor-rokk“, (Hugm.smiður: Benni Sig. og „Netnuddstofa Jónínu Ben (Hugm.smiður Jónína Ben og Haukur Vagns), gefur að líta hugmyndina: „Lögleiðing spilavíta í Bolungarvík, Las Vegas Atlantshafsins.

Þá hugmynd kom hinn frjói lífskúnstner Kristján Jónsson með, en hann hefur lengi verið sérlegur áhugamaður um spilavíti og veðmál.

"Já, þetta gæti verið sú lyftistöng sem byggð á vestfjörðum þarfnast, sérstaklega í ljósi þess að þetta eykur bæði ferðamannastraum, og þar af leiðandi beinar tekjur sveitarfélagsinns. Þetta gæti orðið til þess að sameining sveitarfélaga yrði ekki nauðsynleg, og fyrirhuguð Óshlíðargöng myndu gera mönnum enn auðveldara fyrir að komast milli spilavíta. Einnig væri gaman ef Hólskirkja og séra Agnes tækju upp á svokallaðri Aktu-gifstu þjónustu, þar sem hugmyndin væri að hrað-gifta sig í bílalúgu, líkt og tíðkast í löndunum sem við viljum helst bera okkur saman við. Nú ég sé fyrir mér að íbúar hrífist með, og taki þátt góðærinu, t.d. Eðalvagnaþjónusta Lúðvíks Valdimarssonar, þar sem Lúlli væri búinn að skipta út rúgbrauðinu fyrir skærgula xxxl Hummer limósínu, og jafnvel að Gistiheimilið Gestahúsið taki upp þráðinn þar sem frá var horfið, og rukkað per klukkutímann. Þá gætu lauslátu brókarsýktu unglingsstúlkurnar í plássinu loks tekið þóknun fyrir allt erfiðið, og notið góðærisins líkt og aðrir. Hlédís og Gunnar gætu t.d. selt hótelum guðaveigar, og margt fleira. Vagnssystkinin öll gætu loks fengið sitt eigið show í Víkurbæ, og Pétur Magg gæti sýnt töfrabrögð, skeið í nef og fleira. Sjálfur myndi ég vilja endurvekja gamla JFE, því einsog rannsóknir sýna, þá er starfssemi skipulagðar glæpastarfssemi, eða mafíu, ávallt að finna þar sem áfengi og spilavíti koma saman. Það þýðir væntanlega aukningu í sölu á steypu, skóflum, og kúbeinum, en þetta kemur allt við sögu þegar mafían á í einhverjum útistöðum við skuldara og þessháttar óþjóðalýð, " sagði Kristján mikið niðri-fyrir við blm VSP í dag.

Talið er að bæjarstjórn kjósi um málið á næsta bæjarráðsfundi, og að málið verði samþykkt.

sunnudagur, október 09, 2005

Evrópska ískönnunargeimfarið hrapaði í Norður-Íshafið










Yuri Gagarin í Sputnik rannsóknarstofunni


Rannsókn er hafin á því hvers vegna eldflaug sem flytja átti evrópska ískönnunargervitunglið CryoSat á braut um jörðu hrapaði í Norður-Íshafið í gær.
Með gervitunglinu átti að mæla þykkt og magn íssins á pólum jarðarinnar og afla þannig gagna til nákvæmra útreikninga á bráðnun íssins.


Samband við farið rofnaði nokkrum mínútum eftir að því var skotið á loft frá rússnesku Sputnik geimvísindastöðinni í Kaput í gærkvöldi. Segja Rússar að ísing í lofti hafi valdið því að annar hluti flaugarinnar hafi orðið eldsneytislaus.


Talsmaður rússnesku geimvísindastöðvarinnar, Yuri Gagarín, sagði að hátt bensínverð hafi haft áhrif á undanfara skotsins. “já sko, yfirleitt höfum við fyllt tankinn með 5000 kalli, en við áttuðum okkur ekki á óvenju háu bensínverði, sem varð til þess að tankurinn var ekki nema rétt botnfullur þegar Igor tók bensín, því við áttum ekki meiri pening sko, rússkíj karamba!"

fimmtudagur, október 06, 2005

Íþróttahátíðin haldin í Bolungarvík


Íþróttahúsið Árbær

Hin árlega Íþróttahátíð Grunnskólans í Bolungarvík, verður haldin í íþróttamiðstöðinni Árbæ á morgun föstudag.

Keppt verður í fjölmörgum greinum, einsog sígarettureykingum, E-pillu áti, bjórdrykkju, ölvunarakstri, blóti, og slag, en hugmyndin er sótt í raunveruleikaþáttinn The Contender, sem hefur heilaþvegið unglinga undanfarin misseri.

Forvarnarfulltrúi Bolungarvíkur, Rúnar Geir Guðmundsson, segist sleginn yfir þessum fréttum, enda hafi hans unglingaár eingöngu snúist um heilbrigt líferni, og mottóið verið heilbrigð sál í hraustum líkama.

Einnig sagðist Rúnar ekki skilja keppnisgreinina ölvunarakstur, því slíkt væri algerlega ósiðlegt og í raun kolólöglegt, og ekki unglingum til eftirbreytni.

"Ég neeeeennnnni þessu ekki, að eltast við fulla gríslinga á bíl, það er bara rugl," sagði Rúnar áhyggju-fullur í viðtali við blm VSP í dag.

Skipuleggjandi mótsins, Rúnar Arnarson, vísaði gagnrýni nafna síns til föðurhúsanna, og sagði nauðsynlegt fyrir unglinga að átta sig strax á hættum framtíðarinnar, þannig væru þau betur undirbúin, og tilbúin að takast á við vandamálið með árangursríkari hætti.

miðvikudagur, október 05, 2005

Uppreisn í röðum minnihlutans


Pálína---------------------------------- Soffía----------------------- Elías


Hinar hjartgóðu Vagnssystur Soffía og Pálína, eru grunaðar um samsæri til uppreisnar, og valdaráns innan bæjarstjórnar Bolungarvíkur. Segja þær að samráð hafi verið haft um ógnarstjórn og valdagræðgi, hjá Ísafjarðarbæ annarsvegar, undir handleiðslu Halldórs Halldórssonar, og Bolungarvíkur hinsvegar. Segja þær að hinn illi Elías Jónatansson leiði bæjarfélagið til glötunar, verði ekkert aðgert.

Hafa þær í samvinnu við Kristinn Gunnarsson, Lúðvík Valdimarsson, Magga Hávarðar, Jón Bjartar, og Gumma, pabba hans Jóns Steinars, flutt inn geislasverð og önnur alvæpni, til þess að “koma réttum manni í brúnna,” einsog Pálína orðaði það, og átti þar við Begga Karls.

Elías segist munu verja sig að hætti vestfirskra, en hann hefur í samvinnu við Einar bróðir sinn þróað efnavopn í síldarbræðslunni GNÁ, sem hann segist tilbúinn að beita ef svo bæri undir.

Hann sagði einnig að á tímum kalda stríðsins hafi EG ættarveldið fengið Bandaríkjastjórn til þess að byggja 3000 fermetra neðanjarðarbyrgi, sem næði frá Einarsbúð að frystihúsinu, og þar gætu vígamenn hliðhollir íhaldinu lagt á ráðin, en þar er fullkomið “stríðsherbergi” sem Jónatan Einarsson yngri, hefur dundað sér við að uppfæra, og tölvuvæða, undanfarin 8 ár.

“Matti Bjarna átti hugmyndina að þessu árið 1963, en þá sá hann fram á að hugsanlega myndu Rússarnir ráðast inn í landið, enda Kúbudeilan enn í algleymingi,” sagði Elías undir kvöld.

Elías sagði að lokum að hann væri ekki hræddur við heróp komma og krata tittanna, nema þá helst ef Maggi tæki fram gítarinn, og systurnar myndu syngja með.

Bættar samgöngur fyrir unglinga











Egill Gunn og Einar Kristinn á góðri stund


Björghildur hans Kobba

Bæjarstjórn Bolungarvíkur samþykkti á bæjarráðsfundi í dag, að gangast að tillögum Egils Gunnarssonar, spekúlants, um bættar samgöngur unglinga á rúntinum í Bolungarvík.


Í tillögunni kemur fram að neðanjarðargangnagerð frá Shell-skálanum að Röggu-sjoppu, með stoppi í Finnabæ, sé best fallin til að stuðla að öryggi unglinga, þó sérstaklega á veturna.

“Ja..a sko unga fólkið verður að get...að komist leiðar sinnar,eh eh eh er það ekki?,” sagði Egill Gunn í viðtali við blm VSP í gær.

Talið er að kostnaður við göngin séu 3 billjarðar, en miklar vonir eru bundnar við að Einar Kristinn, sjávarútvegsráðherra, útvegi féð frá ríkinu.

“Hugmyndir Egils eru framsæknar, djarfar, en mögulegar. Ég mun funda með ríkistjórninni um málið, en hugsanlega þarf að selja verðmætar eignir til þess að fjármagna verkið. T.d. kemur til greina að selja Ernirinn, Björghildi hans Kobba, eða skíðalyftuna, við verðum bara að bíða og sjá,” sagði Einar Kristinn nú undir kvöld.