fimmtudagur, mars 20, 2008

Bjartur tekur að sér fararstjórn

Útgerðarmaðurinn Guðbjartur Flosason hefur tekið að sér fararstjórn fyrir íslenska Arsenal klúbbinn á ferðum á vegum klúbbsins. Í tilkynningu sem rakari á Selfossi sendi frá sér segir meðal annars, að Bjartur hafi heimsótt hinn nýja Emirates leikvang svo snemma að hann hafi nánast stillt tækin í fjölmiðlaherberginu. Auk þess séu þeir ekki margir sem eigi til lúkufylli af grasinu á þeim ágæta velli. Sjálfur tjáði Bjartur Sleikipinnavefnum að þetta væri svo sem ekki merkilegt. Aflaheimildir hefðu verið skornar niður um þriðjung og hlutabréfamarkaðurinn væri í frjálsu falli. Eitthvað þyrftu menn að hafa fyrir stafni. Jónmundi Guðmarssyni, bæjarstjóra á Seltjarnarnesi, var nokkuð brugðið er hann heyrði fréttirnar en neitaði að tjá sig um málið þegar eftir því var leitað.

mánudagur, mars 10, 2008

New York maraþonið fær nýja styrktaraðila

Hið víðfræga New York maraþon, sem haldið er árlega einhvers staðar í Bandaríkjunum, hefur að undanförnu fengið nýja styrktaraðila. Í hópi þeirra sem munu auglýsa í kringum viðburðinn í haust; eru Smirnoff vodka og Bombay gin, en þessir áfengisframleiðendur hafa ekki komið að þessum viðburði áður með neinum hætti. Ekki er vitað hvað kveikti skyndilega áhuga þessara aðila, og mun það ekki vera rakið til þess að Hálfdán Gíslason verður á meðal keppenda.