Kristján Jónsson að taka við sænska landsliðinu?

Athafnamaðurinn Kristján Jónsson er til skoðunar hjá sænska handknattleikssambandinu sem næsti landsliðsþjálfari svía. Þykir þetta mikil upphefð fyrir Kristján, sem hefur tiltölulega litla reynslu af þjálfun, en hann var um tíma liðsstjóri hjá UMFB í knattspyrnu og náði býsna góðum árangri með Roma, Ajax og Borussia Mönchengladbach í Championship Manager. Þá hefur hann einnig unnið trúnaðarstörf fyrir Sjálfstæðisflokkinn, sem er nú þónokkuð.

Svenson Karlson Nilson, formaður sænska handknattleikssambandssins, segir Kristján mjög hæfan í starfið, enda hafi hann verið stuðningsmaður sænskra íþróttaliða frá örófi alda.
Þá telji drjúgt að Kristján hafi sótt um sænskan ríkisborgararétt, eftir að sænska liðið tapaði fyrir Íslandi, í leik þjóðanna um sæti á Ólympíuleikunum á dögunum, en það atvik fékk mjög á Kristján, sem lét hafa eftir sér að hann "myndi líklega aldrei ná sér að fullu eftir slíkan harmleik".

Sú staðreynd að sænska tóbaksfyrirtækið (munn) SKOL og vínframleiðandinn Absalut Vodka í Fanta Lemon skuli vera stærsti styrktaraðili sænska handknattleikssambandsins, þykir renna enn sterkari stoðum undir þá kenningu að Kristján sé að taka við sænska liðinu, sem er enn í sárum eftir leikinn við íslendinga.

Fyrrum stórskytta svía, "Faxe" Kondi, sagði í samtali við VSP, að hann teldi Kristján jafnvel koma til greina sem spilandi þjálfara. "Jo. Stjane har so mikket spilleskilning ok fantastiske stadsetninger ad han kan vel vera spillende trenere. So har han ogsa svakilegt teknik ok kan spinne bollen med fantastisker kraften i marken. Hej hej!" sagði "Faxi" á sínu ástkæra ylhýra.

Ekki náðist í Kristján við vinnslu fréttarinnar, en þegar haft var samband við föður Kristjáns, Jón Friðgeir, sagði hann: "Ég hef nú ekki heyrt af þessu, en þessi ráðning kæmi mér lítið á óvart, því þegar ég varð ræðismaður Finnlands á Íslandi, talaði hann ekki við mig í margar vikur á eftir. Hann muldraði eitthvað í bringuna á sér um, að finnar gætu andskotann ekkert í handbolta. Svo tók hann tuskuboltann sinn og dúndraði honum í finnska ræðismannsskjöldinn, sem Gunnar Halls var nýbúinn að setja upp hjá mér."

Talið er að Kristján muni fá mág sinn, Stig, sem er hershöfðingi í sænska hernum, til þess að verða aðstoðarþjálfari sinn. Það muni leysa ýmsa tungumálaörðugleika sem kunna að dúkka upp, en einnig fá aukinn aga í liðið. Þó er ekki víst að Stig geti fengið sig lausan, en hann er í fastri vinnu sem ökuþór í hinum geysivinsælu Top Gear þáttum.