Leit í eigin barm

Um samskonar brjóst er að ræða.
Myndin er sviðsett



Snæfríður Snjólaugsdóttir, 59 ára vörpudrifsfræðingur, leit í eigin barm skömmu fyrir hádegisbilið í gær. Snæfríður hafði nýlokið við að versla ermahnappa og skóreimar á manninn sinn í versluninni Big & Tall og var á leið að kaupa handa sér brjóstahaldara í brjóstahaldarabúðinni Sigyn í Barmahlíð. Eftir að hafa spurst fyrir um nokkra brjóstahaldara öskrar ung afgreiðslukona vel valin ókvæðisorð að Snæfríði og segir henni loks að líta í eigin barm, sem Snæfríður og gerir. Vill þá ekki betur til en að Snæfríður uppgötvar, sér til mikillar skelfingar, að annað brjóstið hangir úti.

Öryggisverðir brugðust fljótt við og náðu að yfirbuga Snæfríði áður en meiriháttar skaði hlytist af, en fjölmörg börn og unglingsdrengir höfðu þyrpst að til þess að híja á Snæfríði.

Prestar úr Bungudalsprestakalli hafa veitt gestum verslunarinnar áfallahjálp í dag, en ljóst þykir að vegið hafi verið að blygðunarkennd fjölda fólks, sem sé “sérlega slæmt svona rétt fyrir jólin” að sögn Biskups Íslands.

Að sögn lögreglu hefur slíkt athæfi færst í aukana, sérstaklega hjá eldri konum í flegnum klæðnaði. Rannsókn málsins stendur yfir.